Durch a rosarote Brille – betracht i s'Leba, was mir lohnend scheint – zom weitergeba, mix i – mit Fantasie – ond ebbes Humor ond stell's ironisch na' – ein Versform vor.
Spaß ond Freud – will i damit bereita en guata – ond en schlechte Zeita, i ben koi Goethe – werd aber au koi Schiller, i ben und bleib – ihr Karle Müller.
Unser schwäbische Sproch
Grüaß Gott – i ben do' – ond will's net verhehla, wenn irgendwo g'feiert wird – derf i net fehla.
Dia Schwoba werdet mi guat verstanda, bei de andre sind sicher Schwierigkeita vorhanda, drom will i mi fir dia jetzt b'sonders o'strenga, ond a bissle schwäbischa Sprochonderricht brenga.
Ons Schwoba secht mr ällerloi noch, aber mr lasset nix komma – uf onser Sproch!
Se zeichnet sich durch ihr'n Wortschatz aus, so vielseitig und blumareich – grad wia Strauß.
Schö isch dui Sproch scho – aber au schwer, i will's Euch beweisa – drom höret mol her.
A Pferd isch a Gual – ergraut der in Ehra, so isch des bei ons – a „Schendermärra!“.
Des gilt au für Fraua – dia nemme ganz jong, bärbeißig ond giftig send – mit Hoor uf dr Zong.
Zom a Sperling saget mr oifach a Spatz, ond mei Alte – des isch woanders a Schatz;
dr Großvadder isch dr Ehne – ond d'Ahna sei Frau, d'Schwiagerdochter isch d'Söhnere – mir nemmet's gnau.
Für dui isch mei Bua ganz schlicht ihr Kerle, d'Patin isch d'Dote – s'Dienstmädle a Perle.
A Lahle könnt au a Tra'fonzel sei, boide send langsam – ond schlofet schier ei.
Dr Ort wo mir wohnet – isch onser Flecka, uf em Burra müaßt mr buddla – bis zum verrecka.
Gibt's amol Krach – em Sonndich's beim Tanza, schlägt mr sich gegaseitig voll – dr Ranza.
Wer g'sond uf em Herz isch – hot a guate Kuttel, wer emmer schempft – der mault oder bruddelt.
Wer romsprengt, der wuselt – wer sitzt, der muaß hocka, a Pupp isch a Dogg – ond d'Goiß tuat mr bocka.
A Pfeiff isch a Kloba – a Hügel a Hubbel ond wer net ufpasst – isch bei ons a Dubbel..
Wer übern Durscht trenkt – hot en Balla, a Menschle uf dr Stroß – des isch a Schnalla.
Kartoffla send Äbiera – ond Schüssla – Gomba, dia wo andere b'scheißet – des send große Lompa.
D'Auga send Glotzer – ond fatzaglatt, isch a Haut – wo noo koine Falta hot.
Wer übertreibt – verzehlt en Schmarra, wer Auto fahrt – hockt ema Karra.
Bei kloinere Sacha sent mr guat dro' jedem Wort hänget mr henta – a „le“ bloß no.
Hent Ihr gaut ufpasst – ond hent Fantasie, no kennet Ihr schwäbisch – so gaut jetzt wia i.
|